Për të tretën ditë radhazi, serbët lokalë janë mbledhur në Zveçan, Zubin Potok dhe Leposaviq, ku po protestojnë kundër kryetarëve të rinj shqiptarë të zgjedhur nga zgjedhjet e jashtëzakonshme të 23 prillit, raporton Gazeta Sinjali.
Ndonëse ka rrezik për eskalim të situatës, për shkak të veprimeve të dhunshme të protestuesve ku si pasojë 30 ushtarë të KFOR-it kanë mbetur të lënduar, krerët shtetërorë të Kosovës aktualisht ndodhen jashtë vendit.
Presidentja e shtetit, Vjosa Osmani, ka udhëtuar për në Kishinau të Republikës së Moldavisë ku do ta përfaqësojë Republikën e Kosovës në samitin e dytë të Komunitetit Politik Evropian (EPC).
“Presidentja Osmani do t’u bashkohet 46 krerëve të tjerë të shteteve të kontinentit evropian si dhe krerëve të institucioneve të BE-së, me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë”, thuhet në njoftimin e Presidencës
Po ashtu edhe kryeministri i vendit, Albin Kurti, ka shkuar jashtë shtetit. Ai po qëndron në kryeqytetin e Sllokavisë, në Bratislavë, ku po merr pjesë në Forumin “GLOBSEC2023”.
“Kryeministri i Republikës së Kosovës, H.E. Albini Kurti, ka mbërritur në Forumin #GLOBSEC2023 në Bratislavë. Dëgjojeni atë më vonë këtë mëngjes në një bisedë me titull: Në qendër të vëmendjes: Ardhmëria e Kosovës”, thuhet në njoftimin e Forumit.
Kujtojmë se Shtetet e Bashkuara të Amerikës dhe aleatët e qortuan Kosovën për përshkallëzimin e tensioneve me Serbinë, duke thënë se përdorimi i forcës për të instaluar kryetarët në komunat me shumicë serbe, minoi përpjekjet për normalizimin e marrëdhënieve mes dy vendeve.
Si pasojë SHBA-ja, mbështetësja më e madhe e pavarësisë së Kosovës, vendosi të anulojë pjesëmarrjen e Kosovës në një stërvitje ushtarake të NATO-s, pasi Prishtina zyrtare refuzoi t’i tërheqë kryetarët e komunave dhe forcat e saj policore nga veriu i vendit.
Ashpër reagoi edhe Sekretari amerikan i Shtetit, Antony Blinken, i cili së fundi i bëri thirrje Kosovës dhe Serbisë që t’i kthehen dialogut të ndërmjetësuar nga Bashkimi Evropian, për normalizimin e marrëdhënieve.
Ai përsëriti se vendimi i Qeverisë së Kosovës për t’i instaluar me forcë kryetarët e rinj në komunat me shumicë serbe në veri, i përshkallëzoi tensionet “në mënyrë të mprehtë dhe të panevojshme”.
Në anën tjetër, NATO-ja do të dërgojë 700 trupa shtesë në Kosovë dhe do të vendosë një batalion tjetër në gjendje gatishmërie të lartë.
Kjo, pasi trazirat në vend u intensifikuan prej se kryetarët shqiptarë morën detyrën në komunat me shumicë serbe në zonën veriore.
Kujtojmë se kryetarët e mëparshëm të Mitrovicës së Veriut, Zubin Potokut, Zveçanit dhe Leposaviqit, vinin nga radhët e Listës Serbe dhe të njëjtit dhanë dorëheqje në nëntor të vitit të kaluar në shenjë pakënaqësie me një vendim të Qeverisë së Kosovës për riregjistrimin e veturave nga targat ilegale të lëshuara nga Serbia në ato RKS.
Zgjedhjet e 23 prillit u bojkotuan nga Lista Serbe dhe nga popullata shumicë serbe në veri, e cila tani nuk i pranon rezultatet, përkatësisht kryetarët e rinj.
