Më shumë se 175,000 ukrainas kanë shkuar në Kanada që kur nisi lufta dhe Kanadaja ka ofruar 6.1 miliardë euro mbështetje për Ukrainën.
Presidenti ukrainas Volodymyr Zelensky do të flasë në Parlamentin Kanadez si pjesë e kampanjës së tij për të forcuar mbështetjen nga aleatët perëndimorë për luftën e Ukrainës kundër pushtimit rus, raporton Euronews.
Zelensky fluturoi në kryeqytetin e Kanadasë të enjten vonë për një vizitë të papritur pas takimeve me presidentin amerikan Joe Biden dhe ligjvënësit në Uashington. Ai foli në takimin vjetor të Kombeve të Bashkuara të mërkurën.
Kryeministri Justin Trudeau, i cili gjithashtu planifikoi të fliste në Parlament të premten, i bëri Zelenskyt një pritje të ngrohtë në aeroportin e Otavës.
Është vizita e parë e Zelenskyt në Kanada që kur Rusia pushtoi Ukrainën në shkurt 2022. Ai më parë iu drejtua Parlamentit kanadez virtualisht pas fillimit të luftës.
Pas fjalimeve të tyre, Zelensky dhe Trudeau janë planifikuar të shkojnë në Toronto për t’u takuar me komunitetin lokal ukrainas.
Kanadaja strehon rreth 1.4 milion njerëz me origjinë ukrainase, afër 4% e popullsisë.
Ambasadori i Kanadasë në OKB, Bob Rae, tha se është e rëndësishme që Zelensky të shohë shkallën në të cilën Kanadaja mbështet Ukrainën në luftë.
