Presidenti i Turqisë, Recep Tayyip Erdogan, ka ofruar të ndërmjetësojë në ngecjen për një central bërthamor të pushtuar nga Rusia në Ukrainë, duke nxitur frikën për një katastrofë atomike.
Kjo ofertë erdhi përpara se mbikëqyrësi global i energjisë atomike të thoshte se centrali bërthamor i Ukrainës në Zaporizhzhia ishte shkëputur nga linja e fundit e mbetur e energjisë elektrike në rrjet dhe tani po mbështetej në një linjë rezervë.
Mes alarmit në rritje për granatimet në zonën e centralit bërthamor më të madh të Evropës në javët e fundit, Ukraina tha të premten se kishte bombarduar një bazë ruse në qytetin aty pranë Enerhodar, duke shkatërruar tre sisteme artilerie si dhe një depo municioni.
Erdogan të shtunën i tha homologut të tij rus Vladimir Putin se “Turqia mund të luajë një rol lehtësues në termocentralin bërthamor të Zaporizhzhia, siç bënë në marrëveshjen e grurit”, deklaron presidenca turke.
Një nga eksportuesit më të mëdhenj në botë për drithëra, Ukraina, u detyrua të ndalojë pothuajse të gjitha dërgesat pasi Rusia nisi pushtimin në fund të muajit shkurt, duke rritur frikën për një krizë globale ushqimore. Eksportet e drithit nëpër portet e Detit të Zi rifilluan pasi Kievi dhe Moska në korrik nënshkruan një marrëveshje, me Kombet e Bashkuara dhe Turqinë që vepronin si garantues
