Seria e fazës finale në “play-offin” e basketbollit nis këtë të mërkurë në Mitrovicë. Trepça dhe Peja takohen sot nga ora 20:00 në palestrën “Minatori”. Të martën janë konfirmuar edhe terminet e ndeshjeve finale nga FBK-ja ku të drejtën e terrenit vendas e ka Trepça. Skuadra që shënon tri fitore shpallet kampione e Kosovës.
Interesimi për bileta është tejet i madh, gjersa tifozët kanë dalur 4 orë më herët në radhë për të siguruar një biletë.
Pushimi për dy skuadrat ishte i shkurtër, madje të vështirë kanë pasur edhe parapërgatitjet për duelet finale. Trepça të dielën në kryeqytet mposhti Prishtinën për të kaluar në finale, derisa Peja humbi finalen e Ligës Ballkanike në Bullgari nga skuadra izraelite Happoel Beear Sheva.
Peja kishte pritshmëri të mëdha këtë edicion për të marrë trofe, por pa e arritur këtë në dy herat e para. U eliminua në çerekfinale të Superkupës dhe Kupës së Kosovës.
Peja në fakt nga 2013 nuk ka arritur të shijojë titullin kampione në Kosovë dhe kjo është një mundësi e mirë për skuadrën që ka pasur luhatje të mëdha në këtë edicion, megjithatë rrugën drejt titullit do ta nisë në një palestër aspak të lehtë. Ajo se çfarë po e karakterizon ekipin pejan është stabiliteti i krijuar me trajnerin izraelit Ramy Hadar.
Ndërkaq për Trepçën kjo është finalja e katërt këtë edicion. Ekipi mitrovicas ka fituar dy trofe. Trepça ka marrë Superkupën Mbarëkombëtar dhe Kupën e Kosovës, derisa në Superkupën e Kosovës humbi nga Prishtina.
Megjithatë edhe te Trepça titulli kampione e Kosovës mungon që nga viti 2012. Por epërsia e terrenit vendas i mundëson një shpresë që ta kthej titullin e munguar që 11 vite.
Peja sezonin e rregullt e ka mbyllur si e dyta dhe ishte e kaluar në gjysmëfinale. Peja në aty mposhti Yllin 3:1 me seri, kurse Trepça e zuri pozitën e katërt dhe fillimisht u ndesh në çerekfinale me Bashkimin, duke e mundur 2:0 në seri. Ndërkaq në gjysmëfinale mitrovicasit mposhtën në seri 3:2 Prishtinën.
Ylli ishte në dy edicionet paraprake kampione e Kosovës, por tani Kosova do ta ketë një kampione të re në këtë sezon.
