Zëvendësi i këshilltarit të Joe Biden për Siguri Kombëtare, Jon Finer e ka telefonuar kryeministrin Kurti, për të folur rreth situatës dhe tensioneve në veri të vendit.
Finer në telefonatën me Kurtin ka nënvizuar shqetësimin e SHBA-së për situatën e tensionuar në veri të Kosovës dhe ka kërkuar nga të gjitha palët që të marrin hapa me qëllim të de-eskalimit të situatës.
Ai i ka bërë thirrje Qeverisë së Kosovës që t’ua mundësojë kryetarëve të rinj që të kryejnë detyrat e tyre nga objekte alterantive dhe që të largohen forcat policore nga objektet e komunave.
Siç thuhet në njoftimin e Shtëpisë së Bardhë, Finer ka mirëpritur gatishmërinë e Kurtit për të punuar drejt kushteve për zgjedhje të reja.
“Z. Finer përsëriti se Shtetet e Bashkuara presin që të dyja palët të riangazhohen në dialogun e lehtësuar nga BE dhe të zbatojnë plotësisht marrëveshjen e normalizimit të arritur në Bruksel dhe Ohër në fillim të këtij viti”, thuhet në njoftim.
Kurti ka thënë se gjatë diskutimit me Finer është zotuar për të punuar me SHBA-në për depërshkallëzimin e tensioneve në veri.
“I lumtur që bisedova me me Zëvendës Këshilltarin e Sigurisë Kombëtare të Shteteve të Bashkuara, Jon Finer. E falënderova për thirrjen dhe u zotova që të bashkëpunim me SHBA-në për t’i depërshkallëzuar tensionet”, ka njoftuar Kurti.
