Koha për t’u rigrupuar pas pengesës së javëve të fundit duket se është ajo që dëshiron të fitojë presidenti rus Vladimir Putin me apelin e tij për armëpushim disa orësh në luftimet në Ukrainë.
Kievi nuk e ka pranuar armëpushimin, ndërsa Perëndimi e karakterizon ” aktrim”.
Në të njëjtën kohë, siç raportohet nga gazeta britanike The Guardian, shërbimi i inteligjencës ushtarake të Ukrainës pretendoi se Rusia do të urdhërojë mobilizimin e rreth 500,000 trupave në janar, në një tjetër shenjë të qartë se Vladimir Putin nuk ka ndërmend t’i japë fund luftës.
Vadym Skibitsky, zëvendës-shefi i inteligjencës ushtarake të Ukrainës, tha se Ukraina besonte se rekrutët do të ishin pjesë e një serie sulmesh ruse në pranverë dhe verë në lindje dhe jug të vendit.
Rusia ka mohuar se po përgatit një valë të dytë mobilizimi, me Putinin që tha muajin e kaluar se ishte “e pakuptimtë” të flitej për rekrutimin e ri, duke pretenduar se vetëm gjysma e atyre tashmë të mobilizuar ishin dërguar në Ukrainë.
Nëse vlerësimi i Kievit rezulton i saktë, Rusia do të ketë dyfishuar fuqinë e saj të paraluftës brenda disa muajsh. Inteligjenca ushtarake e Ukrainës raportoi se 280,000 trupa tokësore ruse janë vendosur aktualisht kundër Ukrainës.
