Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve e sulmeve seksuale. Në shumicën e rasteve viktima po del të jenë edhe të miturat. Një ndër to është edhe një 17-vjeçare nga Gjakovë, e cila po ngacmohet nga një 23-vjeçar në afërsi të shkollës ku ndjek mësimet, raporton Gazeta Sinjali.
Burimet e Gazetës Sinjali kanë bërë me dije se për një rast të tillë Prokuroria ka nisur hetimet, pas denoncimit të nxënëses, e cila bashkë me prindin ia ka mësyrë Policisë për të raportuar ngacmimet e të dyshuarit.
Rasti dyshohet të ketë ndodhur në afërsi të shkollës, ku i dyshuari e ka përcjellë vajzën posa ka dalë nga shkolla, e madje edhe e ka kontaktuar në rrjete sociale, duke i shkaktuar kështu shqetësim e frikë. Sipas provave të siguruara nga Policia, i dyshuari e ka ngacmuar të miturën me thirrje dhe mesazhe, duke i kërkuar që të vazhdojmë komunikimin që kishin nisur.
Madje sipas të njëjtave burime, ai edhe e kishte kushtëzuar, se “ose me qef ose me zor do të të marr”. Përballë kësaj situate, vajza ka vendosur të kërkojë ndihmë nga Policia, duke e raportuar rastin.
Në lidhje me këtë rast, Sinjali mëson se i dyshuari është identifikuar dhe intervistuar nga hetuesit policorë dhe me urdhër të Prokurorit të Shtetit është dërguar në mbajtje për veprën penale “Ngacmim”.
