Reperi nga Gjilani, Feronit Shabani, i njohur me emrin artistik Fero, shumë shpesh bëhet kryefjalë në mediat kosovare për ngatërresat e tij me grupe të ndryshme. E këto konflikte në shumë raste i kanë shkaktuar edhe telashe me ligjin.
Pas rastit të fundit, për të cilin përfundoi edhe në paraburgim, Fero bashkë me dy persona tjerë sërish mbrëmë është përfshirë në një incident, por kësaj here si viktimë.
Sipas Sinjalit në fshatin Bresje të Fushë Kosovës dy persona me të cilët reperi ishte në zënkë, i kanë dalë në pritë dhe i kanë bllokuar rrugën atij. Pos kësaj, dy të dyshuarit kanë shtënë edhe me armë zjarri, por nuk ka pasur pasoja në njerëz.
Lidhur me rastin është njoftuar Policia, të cilët kanë dalë në vendin e ngjarjes ku kanë gjetur dhe sekuestruar një gëzhojë plumbi që dyshohet të jetë e armës që u përdor në rast. Po ashtu janë arrestuar dy të dyshuarit, të cilët janë shoqëruar në stacion policor për intervistim.
Dy të rinjtë kanë deklaruar para hetuesve se tash e një kohë kanë probleme me reperin gjilanas dhe për të njëjtin kanë thënë se i ka kërcënuar dhe ofenduar, gjë e cila sipas tyre, i ka shtyrë të përdorin armën e zjarrit. Arma bashkë me një karikator është sekuestruar në cilësinë e provave materiale.
Pas përfundimit të procedurave policore, Prokurori i Shtetit ka urdhëruar që të dyshuarit të hetohen në liri për veprat penale ‘Sulmi’ dhe ‘Përdorimi i armës apo mjetit të rrezikshëm’.
