Gjermania po përballet me një reagim të ashpër nga aleatët për hezitimin e saj për të furnizuar tanke Leopard 2 për të forcuar kapacitetin luftarak të Ukrainës në luftën gati njëvjeçare me Rusinë, raporton The Guardian.
Të premten, 50 vende ranë dakord t’i sigurojnë Kievit pajisje ushtarake me vlerë miliarda dollarë, duke përfshirë automjete të blinduara dhe municione të nevojshme për të shtyrë forcat ruse.
Por ministri gjerman i mbrojtjes, Boris Pistorius, u tha gazetarëve në bazën ajrore amerikane Ramstein në Gjermani se pavarësisht nga pritshmëritë e rritura, “ne ende nuk mund të themi se kur do të merret një vendim dhe cili do të jetë vendimi, kur bëhet fjalë për tankun Leopard”.
Ukraina të shtunën denoncoi “pavendosmërinë globale” të aleatëve të saj në sigurimin e tankeve moderne , duke thënë se “pavendosmëria e sotme po vret më shumë nga njerëzit tanë”.
Në një deklaratë të përbashkët – dhe një kritikë të rrallë publike ndaj fuqisë më të lartë të Evropës – ministrat e jashtëm të tre shteteve baltike të Letonisë, Estonisë dhe Lituanisë thanë se “i bëjnë thirrje Gjermanisë që tani t’i sigurojë Ukrainës tanke Leopard”.
“Kjo është e nevojshme për të ndaluar agresionin rus, për të ndihmuar Ukrainën dhe për të rivendosur shpejt paqen në Evropë. Gjermania si fuqia kryesore evropiane ka përgjegjësi të veçantë në këtë drejtim”, thuhet në deklaratën e postuar në Twitter nga ministri i Jashtëm letonez, Edgars Rinkēvičs.
