Minsitri i Punëve të Brendshme, Xhelal Sveçla ka folur rreth aksionit të Policisë së Kosovës për bastisjen e një objekti në qendrëqn e Prishtinës e cila dyshohej se po funksiononte ilegalisht.
Sveçla me anë të një postimi në Facebook, ka thënë se sot kanë pranuar informacion për aktivitetin e dyshimtë të një Organizate Joqeveritare, e vendosur në një aneks të Stacionit Policor Qendra në Prishtinë.
Ai shtoi se Departamenti i Organizatave Joqeveritare në kuadër të MPB-së ka konfirmuar se organizata në fjalë “Centar za Mir i Toleranciju Pristina” nuk ka respektuar legjislacionin në fuqi mbi funksionimin e OJQ-ve, shkruan Arbresh.info.
“Pas bastisjeve është kuptuar që ajo hapësirë nuk është shfrytëzuar fare për natyrën e kësaj OJQ-je.”, ka bërë të ditur ai.
Sipas tij, një aktivitet i tillë paraqet rrezik për sigurinë e vendit.
“Kësisoj, kemi njoftuar institucionet përkatëse të sigurisë dhe është konfirmuar se e njëjta ka veprimtari ilegale gjë e cila është vërtetuar pas hyrjes së Policisë dhe Prokurorisë brenda objektit. Një veprimtari e tillë në mes të tre institucioneve më të larta të sigurisë së Kosovës, Ministrisë së Punëve të Brendshme, Kryeprokurorisë dhe Policisë së Kosovës është tejet e dyshimtë dhe paraqet rrezik për sigurinë e vendit.”, shtoi ai.
Sveçla tha se ka kaluar koha kur në Kosovë tolerohej paligjshmëria.
“Republika e Kosovës është shtet unitar me të drejta e shërbime për gjithë qytetarët pa dallim. Ka kaluar koha kur në vendin tonë tolerohej paligjshmëria.”, përfundoi ai.
