Gazeta Neutral ka raportuar sot një skandal që ka ndodhur gjatë ditës së diel, ku vetura zyrtare e ministrit të Mbrojtjes, Ejup Maqedonci u keqpërdor nga një Skender Zeneli, i cili nuk kishte autorizim për ta vozitur veturën e as patentë shofer, raporton Gazeta Neutral.
Zeneli, gjatë xhiros që po bënte u kap nga Policia në fshatin Bardhosh të komunës së Prishtinës.
Për të mos lënë gjurmë tek organet e rendit, Zeneli kishte vozitur veturën me alarm rotativ si metodë për të mos u kapur nga Policia e Kosovës.
Burimet e Neutral bëjnë me dije se Skender Zeneli është vëllai i Zenel Zenelit, ku ky i fundit është shofer në Ministrinë e Mbrojtjes.
Si u kap Skender Zeneli?
Fshati Bardhosh, vetëm 6 kilometra larg Prishtinës është vendi ku Skender Zeneli u kap nga Policia e Kosovës gjatë një kontrolle rutinore.
Derisa po “shëtitej” rrugëve të fshatit, me drita rotative të ndezura, Zeneli ra shumë shpejtë në duart e organeve të rendit. I njëjti, pasi u ndal nga Policia, kishte deklaruar se nuk është person i autorizuar për ta vozitur veturën e tipit “Audi A7”.
Sipas burimeve të Gazetës Neutral, vetura është marrë nga Policia Ushtarake e vendit.
Ndryshe, ky rast nuk është publikuar në raportin 24 orësh të Policisë së Kosovës.
