Nga 15 nëntori, përdoruesit e automjeteve ishin të detyruar të pajiseshin me goma të dimrit, ndryshe do të dënoheshin nga Policia e Kosovës.
E ky detyrim e prek edhe Policinë e Kosovës.
Mirëpo një pjesë e madhe e veturave të Policisë ende po operojnë me goma të verës.
Burimet e Gazetës Neutral bëjnë të ditur se veturat e Policisë së Kosovës vazhdojnë të enden rrugëve me goma dimri, anipse mëngjesin e sotëm bora ka zbardhur vendin dhe si rëndom, jo gjithmonë kompanitë e kontraktuara për mirëmbajtjen e rrugëve, janë të gatshme të ndërhyjnë me kohë.
Kanë mbetur pak më shumë se dy javë deri në përfundimin e periudhës që automjetet kanë për detyrim ligjor të vendosin pajisjet dimërore.
Sipas Ligjit, nga 15 nëntori deri më 15 mars, automjetet dhe bashkësitë e mjeteve që marrin pjesë në trafikun rrugor duhet t’i kenë pajisjet dimërore. Këtu përfshihen gomat e dimrit dhe zinxhirët.
Po ashtu, ligji thotë se gjatë kushteve dimërore ndalohet qarkullimi i automjeteve dhe i bashkësisë së mjeteve të cilat nuk i kanë të vendosura pajisjet dimërore.
Kushtet dimërore, sipas ligjit, nënkuptojnë rastet kur rruga është e mbuluar me borë ose kur në rrugë ka akull.
Shoferi, që drejton automjet pa pajisje dimërore në të ashtuquajturin sezon dimëror, dënohet për kundërvajtje, me gjobë prej 40 eurosh.
Sipas ligjit, dënohet për kundërvajtje, me gjobë prej 100 deri në 300 euro, edhe personi juridik apo institucioni publik në emër të të cilit dhe brenda autorizimeve të të cilit ka vepruar shoferi.
“Gjatë kohës së dukshmërisë së zvogëluar duhet t’i kenë dy drita të bardha në pjesën e përparme të mjetit dhe dy drita të kuqe në pjesën e pasme të mjetit, si dhe një sinjal reflektues me ngjyrë portokalli në çdo anë. Dënohet për kundërvajtje, me gjobë prej dyzet (40) eurosh, shoferi i mjetit i cili vepron në kundërshtim me dispozitat e paragrafëve 1. ose 2. të këtij neni. Dënohet për kundërvajtje, me gjobë prej njëqind (100) deri në treqind (300) euro, edhe personi juridik apo institucioni publik në emër të të cilit dhe brenda autorizimeve të të cilit ka vepruar personi i përcaktuar në paragrafin 5. të këtij neni. 7. Dënohet për kundërvajtje, me gjobë prej tridhjetë (30) eurosh, personi i cili vepron në kundërshtim me dispozitat e paragrafit 4. të këtij neni”.
Sipas Udhëzimit administrativ për pajisje dimërore, të nxjerrë më 24 mars 2017, nga Ministria e Infrastrukturës e Kosovës, pajisjet dimërore për automjetet e udhëtarëve dhe mjetet transportuese deri në 3.5 tonë janë pneumatikët e dimrit në të gjitha rrotat.
Në mungesë të pneumatikëve të dimrit, automjetet e sipërpërmendura duhet t’i kenë pneumatikët verorë me thellësi minimale të sipërfaqes shkelëse prej 4 milimetrash, me zinxhirët e dëborës që vendosen në rrota tërheqëse.
Ndërkaq, pajisjet dimërore për autobus dhe mjete transportuese janë zinxhirët ose pneumatikët e dimrit të montuar në rrotat tërheqëse.
Udhëzimi thekson se autobusët dhe mjetet e transportit mbi 3.5 tonë, që nuk mund të vendosin zinxhirët e dëborës në rrota tërheqëse duhet të kenë pneumatikët e dimrit në rrota tërheqëse.
Penumatikët e dimrit janë të shënuar me shenjë M + S, MS, M & S, ose ndonjë shenjë tjetër identifikuese nga prodhuesi i pneumatikëve.
