Mbrëmjen e së mërkurës një zhurmë e madhe është dëgjuar nga rrufeja në vend. Si pasojë e motit të ligë një aeroplan është goditur nga rrufeja. Gazeta Insajderi nga burime të veta ka mësuar se aeroplani i firmës turke “Pegasus” që po vinte nga Stambolli për në Prishtinë, ishte goditur nga kjo rrufe. Detaje për Insajderin, ka dhënë edhe një pasagjer.
“Ishte e tmerrshme, është zdritë totalisht, dridhje e pa parë”, i tha njëri prej pasagjerëve që po fluturonte me këtë aeroplan.
Më tej, ai sqaroi se aeroplani pas goditjes e humbi baraspeshën.
“Fluturim pasi u goditëm nuk ka qenë i qetë, aeroplani e humbi pak baraspeshën”, u shpreh ai.
Aeroplani siç mëson Insajderi është goditur në momentin që ishte duke ateruar në aeroportin ndërkombëtar “Adem Jashari” në Prishtinë.
Fatmirësisht, nuk ka të lënduar, ka pohuar ky pasagjer.
Insajderi ka provuar të marrë një përgjigje nga zëdhënësja e aeroportit, Valentina Gara, por e njëjta ka kërkuar që të kontaktohet kompania fluturues.
Deri në këto momente nga kompania nuk kanë dhënë detaje mbi rastin.
