Presidenti serb Aleksandar Vuçiq tha se “është mirë të shihet përparim në 31 nga 34 kapitujt” dhe se është e rëndësishme që “Serbia të ecë përpara në rrugën evropiane, por në të njëjtën kohë të ruajë interesat e saj kombëtare”, shkruan Slobodna Bosna, transmeton Ballkani.info.
“Mendoj se është e rëndësishme që në 31 nga 34 kapituj të shihet përparim. Është e rëndësishme për hir të demokracisë sonë që të shohim një ndryshim të veçantë në sferën mediatike, dhe është gjithashtu e rëndësishme për shkak të gënjeshtrave të shumta që janë paraqitur në periudhën e kaluar”, tha ai për TV Prva, duke komentuar raportin vjetor të Komisionit Evropian.
Ai shtoi se duhet bërë shumë më tepër.
“Ka edhe pengesa, vështirësi, më së shumti kanë të bëjnë me Kosovën dhe këtë e keni parë në raport”, tha Vuçiq.
Ai shtoi se shumë njerëz qeshën me të kur “shteti doli me masa”, por se ai “është i kënaqur sepse njerëzit tani mund të blejnë produkte më të lira”.
“Njerëzit gjithashtu mund të blejnë produkte më të lira në treg. Sot gjërat janë dukshëm më të lira”, ka përfunduar Vuçiq.
