Burime pranë grupit parlamentar të Partisë Socialiste thonë se do të kërkojnë përjashtimin e shtatë deputetëve të opozitës pas sherrit të së hënës pasdite në Kuvendin e Shqipërisë, ku pati edhe përleshje fizike.
Të hënën, deputeti Bledion Nallbati u përjashtua nga seanca pasi tentoi të godiste me grusht deputetin socialist, Vullnet Sinaj, teksa ky i fundit po mbante fjalën e tij.
“Nuk ia vlen që të merremi me diçka që nuk nderon askënd”, tha Nallbati një ditë më pas duke komentuar episodin e shëmtuar.
Ky konflikt politik nuk është një rrufe në qiell të pastër, pasi prej javësh, kërkesa e grupit të PD-së hidhen poshtë nga socialistët, të cilët njoftuan se do të kenë sërish të njëjtën qasje.
Seanca e radhës plenare është parashikuar, ditën e enjte, teksa palët politike vijojnë strategjinë e tyre, opozita bllokadën parlamentare, ndërsa mazhoranca miratimin e akteve pa diskutime.
