Komuna e Prishtinës ka njoftuar se të premten, më 22 shtator, nga ora 10:00 do të organizohet aktiviteti “Dita pa makina”.
Sipas njoftimit, kjo ngjarje ndërkombëtare organizohet në 2000 qytete të botës dhe që ka për qëllim inkurajimin e qytetarëve që t’i përdorin sa më pak makinat për transport, e në vend të tyre të shfrytëzojnë transportin publik apo biçikletat.
Me rastin e organizimit të këtij aktiviteti, në këtë ditë nga ora 10:00 deri në 15:00, vetëm rruga ‘Dëshmorët e Kombit’ do të jetë e mbyllur për qarkullimin e veturave.
“Ndërsa, ju qytetarë të dashur mund të merrni me qira, pa pagesë, njërën nga 160 biçikletat ose 60 trotinetet për qarkullim nga fillimi i kësaj rruge deri në fund (rrethi i Flamurit). Pavarësisht se çfarë zgjedhje bëni, kujdesuni për mjedisin dhe bëni ndryshime të vogla në jetën tuaj për të ndihmuar në mbrojtjen e planetit tonë”, thuhet në njoftimin e komunës.
