Një vendim i Agjencisë për Parandalimin e Korrupsionit (APK) ka dëshmuar se shkarkimi i Pranvera Prestreshit nga ministrja e Tregtisë, Rozeta Hajdari, është i pambështetur në prova.
APK-ja, ish Agjencia Kundër-Korrupsionit, nuk ka gjetur konflikt interesi në rastin e ish-zv/drejtoreshës së Agjencisë për Regjistrimin e Bizneseve (ARBK), të shkarkuar më 22 qershor të këtij viti.
Pranvera Prestreshi, e cila ushtronte detyrën e drejtoreshës së ARBK-së kur vendosi për pezullimin e vendimit për mbylljen e televizionit Klan Kosovën, ishte shkarkuar nga pozita një ditë pas vendimit në favor të biznesit. Arsyeja: Dyshohej se ndodhej në konflikt interesi.
“Ushtruesja e detyrës së drejtoreshës Pranvera Prestreshi është zënë nën rrethana të konfliktit meqë ka familjar një avokat që, sipas ARBK-së, punon për Klan Kosova”, thuhej në vendimin e ARBK-së për shkarkimin e Prestreshit.
Por, Pranvera Prestreshi nuk ndodhet në konflikt interesi, ka konstatuar Agjencia për Parandalimin e Korrupsionit në një vendim të nxjerrë të hënën më 21 gusht, rreth dy muaj pas shkarkimit të saj.
Agjencia për Parandalimin e Korrupsionit ka ardhur në përfundim se pas hetimeve të zhvilluara, nuk ka prova të mjaftueshme që e argumentojnë dyshimin e arsyeshëm për ekzistimin e konfliktit të interesit në rastin e saj.
“Mbyllet rasti për zyrtaren, znj. Pranvera Prestreshi, ish-zëvendës drejtoreshë e përgjithshme e ARBK-së, për shkak se nuk ka prova të mjaftueshme që e argumentojnë dyshimin e arsyeshëm për ekzistimin e konfliktit të interesit”, thuhet në vendimin e APK-së.
ARBK-ja kishte ngritur pretendimet për konflikt të interesit pas dyshimeve se avokati Blerim Prestreshi, vëllai i Pranvera Prestreshit, ka afërsi me Klan Kosovën.
Pas kësaj, ARBK-ja pretendonte se ish-zv/drejtoresha ka deklaruar që avokati Blerim Prestreshi, djali i vëllait të burrit të saj, është avokat dhe i njëjti në vitin 2015, kishte firmosur një kontratë për bartje për Klan Kosovën.
Sipas saj, një kontratë e tillë ka qenë pjesë përbërëse e dokumentacionit që është dorëzuar në ARBK për ndryshime në informatat e biznesit dhe jo në certifikatën e regjistrimit.
“Në këtë periudhë […] nuk kam punuar dhe nuk kam pasur asnjë pozitë në sektorin e regjistrimit të bizneseve e rrjedhimisht as në ndryshimet që bëhen në një subjekt. […] jam caktuar në pozitën e zv/drejtores të ARBK-së më datë.. 24.02.2023 dhe këtë funksion e kam ushtruar deri më 21.06.2023 […] B.P., as si avokat e as në ndonjë cilësi tjetër, nuk ka parashtruar kërkesë në ARBK për korrigjimin, ndryshimin, plotësimin apo çfarëdo veprimi tjetër, por edhe në emër të K.K., si pasojë e të cilave paska ardhë deri tek shfuqizimi I vendimit për pezullim të certificates së regjistrimit”, ka thënë Pranvera Prestreshi në një përgjigje për APK-në.
“Vendimi për shfuqizim nuk është nxjerrë në bazë të ndonjë kërkese nga ana e tij por sipas kërkesës së bërë […] nga ana e përfaqësuesit të autorizuar të K.K. SH.P.K. […] edhe sikur të kishte një kërkesë të parashtruar nga ana e B.P., e që nuk është, ai është djali I kunatit tim (djali i vëllaut të burrit) që nuk hyn në kategorinë e anëtarëve të familjes (personave të afërm) sipas ligjit […]”.
Pranvera Prestreshi ka qenë zv/drejtoreshë nga 24 shkurti deri më 21 qershor. Me vendimin e 14 qershorit, është pezulluar certifikata e biznesit të Klan Kosovës, e datës 29 maj, 2020.
Vendimi është nënshkruar nga Prestreshi, në cilësi të zv/drejtoreshës së ARBK-së. Të nesërmen, ajo e kishte korrigjuar këtë vendim, për shkak të një “gabimi në preambulë”.
Më pas, më 21 qershor, ishte shfuqizuar vendimi i 14 qershorit, ku ishte pezulluar certifikata e biznesit të Klan Kosovës.
Kjo, nuk ishte pritur mire nga pushteti. Pushtetarët e LVV-së e shkarkuan Pranvera Prestreshin. Në vend të saj, Ministria e Tregtisë e emëroi Lebibe Halitin, motrën e deputetit të LVV-së, Enver Haliti./Paparaci/.
