Shërbimi Spitalor Klinik dhe Universitar i Kosovës ka dalë me njoftim për rastin e rëndë që ka ndodhur mbrëmë në Klinikën e Psikiatrisë, ku një pacient vdiq pasi dyshohet se ia vuri flakën dhomës në të cilën ndodhej. Zjarri u hap rreth orës 23:00, teksa vdekjen e viktimës e konstatoi ekipi mjekësor, raporton Gazeta Sinjali.
Në njoftimin e SHSKUK-së thuhet se pacienti vdiq si pasojë e ngufatjes nga tymi dhe përkundër përpjekjeve të stafit shëndetësor për ta shpëtuar, ai vdiq.
“Qendra Klinike Universitare e Kosovës (QKUK), njofton se mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore. Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë e ngulfatjes nga tymi (asfiksioni) ai ka humbur jetën, përkundër përpjekjeve maksimale të stafit shëndetësor për ta shpëtuar pacientin”, thuhet në njoftimin e ShSKUK-së.
Për shkak të tymit, thuhet se i gjithë ekipi kujdestar u asfiksua, e po ashtu edhe një paciente tjetër.
“Gjithashtu gjatë kësaj kohe, një paciente tjetër ka pësuar shenja të helmimit nga tymi, e poashtu e tërë ekipi kujdestare, dy mjekë dhe dy infermiere të cilët gjatë ofrimit të ndihmës për pacientin në fjalë dhe evakuimit të pacientëve të tjerë, kanë manifestuar shenja të helmimit nga tymi dhe kanë marrë ndihmë mjekësore në Klinikën Emergjente. Rasti është duke u hetuar nga njësitet përkatëse të Policisë së Kosovës”, përfundon njoftimi.
