Blerim Vela, shef i stafit në kabinetin e presidentes, Vjosa Osmani ka reaguar shumë ashpër lidhur për pretendimet e fundit se Gjykata Kushtetuese mund ta rrëzojë Vjosa Osmanin nga posti i presidentes.
Ky reagim kaq i ashpër i Velës, tregon se Vjosa Osmani mund ta shpërfillë vendimin e Gjykatës Kushtetuese, shkruan Neutral.
Ai ka shkuar aq larg sa e ka quajtur edhe tentim puç ndaj institucioneve, raportimin e mediave.
Vela përmes disa postimeve në Twitter, ka thënë sot se këto pretendime janë synim perfid për t’i bërë presion gjykatës dhe të për të krijuar huti në publik.
“Pretendimet se gjoja Gjykata Kushtetuese do ta “rrëzojë” Presidenten, është synim perfid për t’i bërë presion Gjykatës dhe për të krijuar huti në publik. Gjykata Kushtetuese është institucion i pavarur, e cila ka detyrim të qartë ligjor për të ruajtur integritetin e vendimmarrjes gjyqësore”, ka shkruar Vela.
Ai më tej ka shtuar se kanë plotësisht të qartë se “dezinformatat dhe propaganda që bëhet gjoja duke u thirr “në burime brenda Gjykatës”, janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhen në listën e zezë të ShBA-ve”.
Vela ka theksuar se çfarëdo skenari eventual për të shkaktuar kriza institucionale në Kosovë dhe për ta nxjerrë nga binarët procesin e dialogut (në veçanti për ta parandaluar zbatimin e nenit 4, të marrëveshjes), është vetëm skenar i vetë Serbisë.
“Pra, kjo është përpjekje për ndikim të vendimmarrjes gjyqësore dhe tentim puç ndaj institucioneve legjitime të Republikës së Kosovës, dhe si e tillë do të dështojë”, ka shkruar Vela.
Tash e dy vjet, ish-kandidatët për deputetë, Veton Berisha dhe Albert Kinolli presin përgjigje nga Gjykata Kushtetuese në ankesën me pretendime se u janë shkelur te drejtat gjatë zgjedhjeve të vitit 2021.
Ka raportime se një vendim i Kushtetueses në favor të Berishës dhe Kinollit do ta detyrojë Osmanin të largohet nga posti i presidentes. Kjo mbetet të shihet pas publikimit të vendimit të GJK-së.
