Franca ka mbështetur aplikimin e Kosovës për anëtarësim në Bashkimin Evropian, ndërsa bën thirrje që vendi të vazhdojë me reforma.
“Franca mbështet perspektivën evropiane të Kosovës, ashtu sikurse edhe të vendeve të tjera të Ballkanit Perëndimor”, ka thënë ministrja e Jashtme e Francës.
Franca i bëri thirrje Kosovës “që të vazhdojë reformat e nevojshme për afrimin e saj evropian, veçanërisht në fushën e sundimit të ligjit dhe mbrojtjen e personave që u përkasin pakicave. Franca do të vazhdojë të mbështesë përpjekjet në këtë drejtim”.
Më tej, në komunikatën e MPJ-së franceze, i kërkohet Kosovës, sikurse edhe Serbisë, që të angazhohen “me përgjegjësi dhe konstruktivitet në dialog me synimin e normalizimit të marrëdhënieve ndërmjet Beogradit dhe Prishtinës”.
Ky, thotë Franca, “është kusht thelbësor për afrimin evropian të dy vendeve dhe stabilitetin e të gjithë rajonit”.
Kryeministri i Kosovës, Albin Kurti, i dorëzoi të enjten Çekisë – vendit që aktualisht kryeson Presidencën e Bashkimit Evropian – aplikimin e Kosovës për anëtarësim në BE.
