Ambasadori i ShBA-së në Kosovë, Jeffrey Hovenier, ka bërë të ditur se i ka kërkuar Qeverisë së Kosovës ta shtyjë vendosjen e gjobave për 48 orë.
Hovenier tha se këtë kërkesë ia ka bërë qeverisë për t’i lejuar ShBA-të dhe BE-në që t’i angazhojnë palët për të gjetur një zgjidhje.
“Shtetet e Bashkuara janë të shqetësuara se liderët e Kosovës dhe Serbisë nuk arritën sot të arrijnë një marrëveshje për zgjidhjen e krizës aktuale në Kosovë. Kemi kërkuar nga Qeveria e Kosovës që të shtyjë për 48 orë vendosjen e gjobave për t’i lejuar BE-së dhe Shteteve të Bashkuara të angazhojnë më tej palët për të gjetur një zgjidhje”, është shprehur Hovenier, transmeton Klankosova.tv.
Kujtojmë se kryeministri i vendit, Albin Kurti, dhe presidenti serb, Aleksandar Vuçiq, u takuan sot në Bruksel për të gjetur një zgjidhje për çështjen e targave, por sipas ndërmjetësit, Josep Borrell, ishte kryeministri Kurti ai që refuzoi propozimin e tij.
Sipas Borrellit, propozimi i tij thoshte që Serbia të mos prodhojë më targa KM dhe Qeveria e Kosovës të mos shqiptojë gjoba, por vetëm qortime për të gjithë ata që kanë targa ilegale
