Qeveria e Kosovës ka dalë me strategji të re kundër drogës. Në të përfshihen objektiva e plane veprimi sidomos në parandalimin e konsumimit.
Nuk janë të pakta rastet kur në Kosovë, konfiskohen sasi të konsiderueshme droge, zbulohen e shkatërrohen laboratorë droge, e fatkeqësisht edhe raportohen vdekje nga mbidoza.
Për të adresuar këtë, Qeveria e Kosovës ka miratuar strategjinë e re kundër drogës për vitin 2024-2028 që përfshin çdo detaj në 46 faqe dokument, raporton RTV Dukagjini.
Kjo strategji parasheh disa objektiva.
“Ndërprerja e kanaleve të distribuimit të drogës në masa të vogla dhe mesme. Zvogëlimi i kërkesës për drogë. Parandalimi i përdorimit të drogës. Sigurimi i qasjes dhe forcimi i shërbimeve të trajtimit, kujdesit dhe rehabilitimit të përdoruesve të drogës. Risocializimi dhe ri-integrimit në shoqëri i përdoruesve të drogës. Kufizimi i përdorimit të drogës në burgje dhe adresimi i nevojave shëndetësore dhe shoqërore të të burgosurve gjatë vuajtjes së dënimit dhe pas lirimit”, tha strategjia shtetërore kundër drogave.
Strategjia ka edhe Planin e Veprimit të saj ku parashihen aktivitete të veçanta për arritjen e objektivave të caktuara.
“Hartimi i Ligjit të ri për Substancat Psikoaktive dhe Barnat Psikotrope. Themelimi i Ekipeve të Përbashkëta të Hetimit në kuadër të PSRK sipas rasteve e ndërlidhura me drogat. Hartimi i PSO-së së re të Policisë për fushën e hetimit të drogave. Organizimi i takimeve të rregullta koordinuese për të vlerësuar përpjekjet dhe për të planifikuar veprime operative-hetimore. Avancimi i sistemeve dhe softuereve në kuadër të Policisë së Kosovës për analiza në fushën e drogave”.
“Ngritja e kapaciteteve të zyrtarëve të Drejtorisë së Inteligjencës dhe Drejtorisë së Anti-Drogave në kuadër të PK për profilizimin e grupeve kriminale që trafikojnë drogat. Zhvillimi i operacioneve policore ku përfshihet bastisja dhe konfiskimi i drogës, provave materiale, dhe parave e pasurive të paligjshme që lidhen me rastet e drogave. Trajnim i specializuar për Policinë e Kosovës për metodat e bastisjes, duke përfshirë sigurimin personal të personave që zhvillojnë bastisje”, thotë strategjia shtetërore kundër drogave.
E në këtë strategji ka punuar edhe Instituti Labirinth ku drejtuesi i saj thotë se dokumenti është punë e frytshme e disa prej institucioneve, por që ai pret zbatueshmëri të saj.
Ndërkohë Blakaj tregon se si është situata aktuale me përdorimin e drogave në Kosovë.
Strategjia do të ketë edhe dy vlerësime, një afatmesëm dhe një përfundimtar në fund të vitit 2028, kur edhe do të përfundoj cikli kohor i saj.
