Madonna ka paralajmëruar një koncert falas në Rio de Zhaneiro për të përfunduar turneun e saj. Superylli do të luajë në plazhin e famshëm Copacabana më 4 maj.
Sipas këngëtares, performanca falas është një falënderim për “fansët e saj të jashtëzakonshëm” që e kanë mbështetur për më shumë se katër dekada.
Këngëtarja 65-vjeçare premton se ky do të jetë spektakli i saj më i madh. Më tej ajo shprehet se nuk kërkohen bileta për eventin.
Kjo performancë është koncerti i saj i vetëm në Amerikën e Jugut të Turneut Celebration. Ajo performoi për herë të fundit në Brazil në vitin 2012.
Madonna aktualisht po udhëton nëpër Amerikën e Veriut me The Celebration Tour. Vitin e kaluar ajo dha edhe dy shfaqje në Ziggo Dome në Amsterdam.
