Kryetari i Sindikatës së Punëtorëve të Sektorit Privat, Jusuf Azemi, ka deklaruar për Ekonomia Online se nuk do të tërhiqen punëtorët nga greva deri në plotësimin e kushteve. Nga 250 euro sa i marrin aktualisht, ata po kërkojnë që paga e tyre të jetë 400 euro.
Greva e punëtorëve teknik dhe fizik ka nisur në të gjitha fakultetet dhe në Qendrën Studentore. Numri i tyre në total është 262 punëtorë.
Ndonëse u është ofruar një rritje prej 15 për qind, për Azemin është e papranuar pasi rritja e pagës shkon në 320 euro.
“Ne kemi hy në këtë Grevë gjithë herë duke luajtur rolin që e kemi deri më tani kemi bërë opsione që të hym në Grevë dy ditore dhe të presim dialogun deri në këtë moment nuk kemi ndonjë dialog të sinqertë sot kemi hy në ditën e dytë do të bëjmë grevë nesër dhe pasnesër do të ndryshojmë çështjen e Grevës nëse nuk ka diçka që lëviz. Neve na është ofruar një shumë prej 15 për qind rritje të pagave që është për neve shumë qesharake i bie që dikund 320 euro dhe në fakt po themi është nënçmim për neve sepse ne në fakt kemi kërkuar që paga jonë të jetë e barabartë me pagën e punëtorëve në sektorin publik që e kryen të njëjtën çështje”, tha Azemi.
Kryesindikalisti tha se grevës do t’i qëndrojnë deri në fund. Ai citon edhe ligjin mbi grevën.
“Ne jemi shumë komod, ne kem i hyrë në bazë ligjore ne assesi nuk do të dalim pa u përmbush kërkesa jonë minimale që ajo nënkupton të jetë rreth 400 euro pagë neto. A do të vazhdohet a do të ndalet kjo grevë, është mirë me e pyet rektorin sepse ne e kemi diçka të qartë, pa u plotësu kërkesat tona ne do të qëndrojmë këtu dhe nuk kemi lëvizje assesi sepse po them nuk jemi ata që kemi qenë para dy vitesh kur na kanë thënë ‘nëse dëshiron me punu puno, nëse do shko’. Përndryshe ligji mbi greva na garanton qëndrim edhe njëmujor edhe dymujor dhe ne kemi hyrë me të drejtat tona minimale dhe rektorati është i obliguar nëse atij i konvenon që gjendja të jetë kështu kaotike dhe neve më në fund ne jemi punëtorë këtu por nuk jemi menaxher të rektoratit dhe normal që mjaft kemi punuar për të tjerët tani do të punojmë edhe pse edhe kushtet minimale nuk i mbulon paga minimale që e kemi por megjithatë ne jemi shumë të sinqertë dhe po e kërkojmë atë çka sektori publik iu ka ofruar punëtorëve me të njëjtën veprimtari”, tha Azemi.
