Pas një kohe në arrati, duke tentuar t’i shpëtojë drejtësisë, i kërkuar për fajde ka rënë tashmë në prangat e Policisë në Vushtrri. I njëjti është arrestuar dhe shoqëruar në stacion policor, ndërsa tashmë ndodhët në qendrën e mbajtjes, raporton Gazeta Sinjali.
Sinjali ka mësuar ekskluzivisht se bëhet fjalë për Rrahman Sopjanin, 39-vjeçar – i cili është kapur të shtunën në mbrëmje, në një lokal në Vushtrri, pasi Policia arriti të lokalizojë vendndodhjen e tij.
Sopjani ishte shpallur në kërkim policor dhe ndaj tij kishte urdhëresë aktive, nën dyshimet se ka kryer veprën penale “Fajde”.
39-vjeçari ia doli ta shijojë lirinë nga arratia, por tashmë do të përballet me dyshimet e ngritura ndaj tij, për përfshirje në veprimtari kriminale.
Lidhur me rastin, Krimet e Rënda në koordinim me Prokurorin e Shtetit, kanë ndërmarrë veprimet e nevojshme, me ç’rast ndaj të dyshuarit është nxjerrë aktvendim për ndalim.
Brenda afatit ligjor, Prokuroria do të ushtrojë kërkesë në Gjykatë, për caktimin e masës së sigurisë ndaj Sopjanit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
