Deri në vitin 2010 çdo serb është paguar nga 30 euro (shumë ekuivalente në dinarë serb) në baza ditore për të protestuar.
Kështu bëri të ditur ish-hetuesi i Policisë së Kosovës, Murat Mehmeti, gjersa komentonte rregullore e re të Bankës Qendrore të Kosovës, që ndër të tjera ndalon përdorimin e dinarit serb.
“Nuk ka mundësi të dihet kur paraja hyn në rrugë ilegale, dytësore, jashtë pikave të kalimit kufitar, ku ka pika doganore. Po flas në aspektin e sigurisë, deri në vitin 2010, çdo protestues – kemi pas aq kapacitet që në grupin e protestuesve të palës tjetër ta rekrutojmë një person që merr pjesë në protesta, të bëj të njëjtat veprime dhe në mbrëmje të na tregojë neve – çdo protestues është paguar 30 euro në vlerë ekuivalente në dinarë, vetëm pjesëmarrje me gjuajt gurë në baza ditore”.
“Ato para nuk janë siguruar përmes bankës, ato janë fonde të zeza, të cilat janë përdorë për shkaktim të destabiliteti në vendin tonë”, ka thënë Mehmeti në “Debat Plus”.
Kujtojmë se rregullorja e BQK-së ka hyrë në fuqi më 1 shkurt, ku, ndër të tjera, parashihet që valuta e vetme për kryerje të pagesave në Kosovë të jetë euro.
Ndalimi i dinarit serb ka nxitur reagime dhe kritika ndaj Kosovës nga Shtetet e Bashkuara të Amerikës dhe Bashkimi Evropian.
