Pesë diplomatët perëndimorë, Mirosllav Lajçak, Gabriel Escobar, Emanuel Bonne, Jens Plotner dhe Franceso Talo, kanë arritur te objekti i Qeverisë së Kosovës, ku do të takohen me kryeministrin Albin Kurti. Pas tyre, duke hyrë në objektin e qeverisë është parë edhe Ambasadori i ShBA’së në Kosovë, Jeffrey Hovenier.
Takimi mes tyre ishte paraparë të fillonte në orën 10:00. Sipas informacioneve që ka siguruar Gazeta Express, ata do të sjellin draft statutin e Asociacionit të Komunave me Shumicë Serbe të përgatitur nga ekipet e tyre. Ky draft-statut i Asociacionit mbështetet edhe në Pakon e Ahtisaarit që është edhe baza e Kushtetutës së Kosovës.
Që prej prezantimit të planit franko-gjerman, Perëndimi ka insituar që pala kosovare të dalë me një draft-statut për Asociacionin e Komunave me Shumicë Serbe që shihet si pjesa kyçe e marrëveshjes. Nga pala kosovare nuk ka pasur ndonjë lëvizje.
Ideja që ndërmjetësi të sjellë në negociata draft-statutin është diskutuar nga shefi i diplomacisë së BE’së, Josep Borrell, në akademinë verore “Quo vadis Europa?”, në Santander të Spanjës nga data 21 deri më 25 gusht. Por, zhvillimet në Veri, ose më saktë sulmi terrorist i 24 shtatorit në Banjskë, ka shtyrë gjithcka.
Në takimin e 14 shtatorit në Bruksel pala kosovare kishte hedhur poshtë planin e sekuencimin të propozuar nga ndërjetësit që parashihte që zbatimi i Aneksit të Ohrit të fillonte me fillimin e hartimit të dokumenteve për themelimin e Asociacionit në këmbim të heqjes së fusnotës/ asteriksin me të cilën prezantohet Kosova në disa forume rajonale, Express.
Zyrtarisht, pritjet nga vizita e Pesëshes në Kosovë dhe Serbi janë se ata do të vijnë me kërkesa specifike për palët duke kërkuar implementimin e marrëveshjes së Brukselit dhe Aneksit të Ohrit pa vonesa e pa kushte.
