Të shtëna me armë zjarri janë dëgjuar sonte te banesat e bardha në lagjen Bregu i Diellit në Prishtinë. Dyshohet se është gjuajtur me kallashnikov dhe deri tani nuk është raportuar për të lënduar, raporton Gazeta Sinjali.
Sinjali ka mësuar ekskluzivisht se sipas informacioneve të para, personi që po dyshohet për përfshirje në këtë rast është Harbin Vitija, emri i të cilit pritet të konfirmohet tutje.
Lajmin tashmë e ka konfirmuar edhe zëdhënësi i Policisë së Kosovës për Rajonin e Prishtinës, Agron Borovci. Ai tha ka deklaruar se Policia menjëherë ka dalë në vendin e ngjarjes dhe ka ndërmarrë të gjitha veprimet e nevojshme policore.
“Nga veprimet e para policore në vendin e ngjarjes janë gjetur dhe sekuestruar disa gëzhoja, ndërkohë që deri më tani nuk raportohet për persona të lënduar”.
Një banor në atë zonë ka rrëfyer për Sinjalin se kanë dëgjuar “minimum 10 herë të shtëna” duke e trazuar gjithë lagjen. Sipas tij, dyshohet se ka pasur një konfrontim në mes dy grupeve.
Sinjalizuesit e Sinjalit kanë bërë me dije se Policia tashmë ka bastisur një lokal.
