Një djalosh 9-vjeçar në Turqi, i cili i mbijetoi tërmetit vitin e kaluar, ka bërë donacion paratë e grumbulluara për t’ua zgjatur dorën përpjekjeve të shpëtimit pas tërmetit shkatërrues të së hënës në Türkiyen juglindore.
Alparslan Efe Demirit iu thye zemra kur e pa në televizor shkatërrimin e shkaktuar nga dy tërmetet e fuqishme që goditën Turqinë.
Vetëm disa muaj më parë, Demir duhej të jetonte përkohësisht në tendat e ngritura nga Autoriteti i Menaxhimit të Fatkeqësive dhe të Emergjencave (AFAD), pasi një tërmet me magnitudë 5.9 ballësh goditi provincën veriperëndimore Duzce në nëntor.
I mërzitur për vuajtjet e njerëzve, djaloshi i tha nënës së tij Sinem Demir se dëshironte të dërgojë paratë e mbledhura në arkën e vogël për fëmijët e tjerë.
Nëna dhe djali vizituan degën e Kryqit të Kuq në Duzce dhe ua dorëzuan paratë autoriteteve.
Djaloshi përloti punonjësit e Kryqit të Kuq me letrën që kishte shkruar për të mbijetuarit e tërmetit.
“U trishtova kur ndodhi tërmeti në Duzce. Kisha frikën e njëjtë kur dëgjova për tërmetet në shumë qytete tona. Prandaj, vendosa të dhuroj paratë, që m’i dha familja, për fëmijët në ato zona”, ka shkruar 9-vjeçari.
“Nuk ka gjë nëse nuk blej çokollatë këtu. Fëmijët atje nuk duhet të jenë në të ftohtë ose të uritur. Do t’i dërgoj rrobat dhe lodrat e mia për fëmijët atje”, ka shkruar mes të tjerash djaloshi në letrën emocionale.
Dy tërmete të fuqishme 7.7 dhe 7.6 ballësh goditën Türkiyen dhe Sirinë të hënën më 6 shkurt. Numri i viktimave ka kaluar mbi 5 mijë deri tani, ndërsa vazhdojnë operacionet e kërkim-shpëtimit në 10 provincat e prekura.
