Janë bërë dy vite që kryeministri Albin Kurti është duke udhëhequr me vendin dhe gjatë këtyre dy viteve për shtetin e Kosovës nuk ka pasur njohje të reja. Sipas analistëve politikë mungesa e njohjeve të reja lidhet me të metat në diplomacinë e jashtme dhe me procesin e dialogut, raporton Ekonomia Online.
Sipas tyre, mungesa e njohjes nga ana e Serbisë, e pamundëson që Kosova të ketë sukses në politikën e jashtme.
Njohësi i çështjeve politike, Arbnor Sadiku, tha se mungesa e njohjeve lidhet me dy aspekte.
Sipas tij, fajtor kryesor është moskoordinimi në politikën e jashtme nga Ministria e Punëve të Jashtme.
Duke folur për marrëveshjen finale me Serbinë, Sadiku thotë se pesë vendet mosnjohëse vetvetiu shprehin interesim për ta njohur Kosovën.
“Në një formë ose në një tjetër mungesa e njohjeve për Kosovën ka qenë si rezultat i dy aspekteve. Në njërën anë ka pasur për justifikim mos koordinimin e politikës së jashtme nga vetë MPJ-ja ministrja Gërvalla dhe të njëjtën kohë ka pasur një abstenim të shteteve të ndryshme në botë për faktin se është parë si momentum final i arritjes së një marrëveshje midis Kosovës dhe Serbisë. Pas arritjes së kësaj marrëveshje konsideroj që do të ketë edhe vetvetiu njohjet qoftë nga 5 vendet e BE-së që se kanë njohur Kosovën dhe disa vendet e tjera që janë bashkëpunëtore të demokracive liberale”, tha ai.
Sadiku konsideron se riformatimi i kabinetit qeveritar është i nevojshëm, shkaku i siç thotë dështimit për të sjellë njohje të reja. Ai thotë se MPB-ja duhet të ndërrojë ministër.
Sadiku nuk e përjashton mundësinë që të ketë ndërrim të Qeverisë, me atë teknike.
“Unë kam besuar që më herët është dashur që të ketë në disa fusha riformatim të kabinetit qeveritarë, veçanërisht në Ministrinë e Punëve të Jashtme, kemi pasur shumë defekte si në përfaqësimin në botën e jashtme. Tani pas ngjarjeve të fundit gjasat janë që mund të kemi një afat për zgjedhje të reja dhe nuk do ti mbetet kohë kësaj qeverie që të ketë riformatizim. Të njëjtën kohë mund të kemi një qeveri si opsion shtesë, një qeveri e cila mund të quhet e Unitetit Kombëtarë apo qeveri teknike e cila mund të përfaqësohet nga gjitha partitë politike në vend dhe më pas të kemi një konsensus për krijimin e Asociacionit të Komunave me Shumicë Serbe”, tha ai.
Edhe analisti politik Mazllum Baraliu, tha se mungesa e njohjeve lidhte me të metat e politikës së jashtme dhe me lobimin e shtetit serbë kundër njohjeve ndaj Kosovës.
“Gjithsesi që kemi të meta dhe gabime dhe pikërisht disa gabime që janë bërë në politikë të jashtme nga qeverisjet e më hershme kanë shkaktuar, sidomos dialogu i cili filloj si teknik dhe po vazhdon që 12 vite e ka mundësuar Serbisë që ta rikthej çështjen prapa. Serbia e ka plasuar duke dhënë miliona para që duke ju treguar të tjerëve që nuk duhet ta njohin Kosovën madje duhet edhe ta çnjohin për arsye se ne jemi në proces negociator, ky është faktori kryesorë”, tha ai.
Baraliu po ashtu tha se këto gabime në diplomacinë e jashtme kanë shkaktuar problemet edhe me Serbinë si dhe më bashkësinë ndërkombëtare.
“Sigurisht gabimet e një diplomacie e jona e cila përmes Ministrisë së Jashtme dhe institucioneve të tjera ka qenë e pa denjë që të krijoj një shkollë diplomatike dhe të zhvilloj një diplomaci në nivel për të ju kundërvënë Serbisë, janë gabimet tona jo vetëm në fushën e diplomacisë por edhe në fusha të tjera prandaj i kemi këto pasoja edhe më Serbinë dhe bashkësinë ndërkombëtare”, tha ai.
