Kryeministri i Kosovës, Albin Kurti është pritur sot nga presidenti turk, Recep Tayip Erdogan, në vizitën e parë zyrtare në Turqi.
Në konferencën e përbashkët për media me Kurtin, Erdogan ka thënë se shpreson që procesi i dialogut të Kosovës me Serbinë të përfundojë në një mënyrë që do të sigurojë paqe të qëndrueshme dhe stabilitet në rajon.
Erdogan ka thënë se Turqia i kushton vëmendje të madhe ndërtimit të marrëdhënieve paqësore të Kosovës me fqinjët e saj.
Ai po ashtu ka kërkuar nga Kurti që të bëjë më shumë për gylenistët që janë në Kosovë dhe kërkohen nga Turqia për tentim puçin e vitit 2016, shkruan Demokracia.com.
Mirëpo, për dallim nga liderët tjerë që Erdogan i pret në Pallatin e tij presidencial në Ankara, Kurti u prit në Stamboll në rezidencën Vahdettin dhe pa ceremoni të theksuar shtetërore.
Rezidenca Vahdettin është në pjesën e ngritur të Stambollit, por për nga rëndësia, arkitektura dhe fuqia është larg nga Pallati Presidencial në Ankara, në kryeqytetin turk.
Ndryshe nga Kurti, Erdogan i kishte organizuar pritje madhështore presidentes Osmani në Ankara në vizitën e fundit.
