Presidentja e Kosovës, Vjosa Osmani tha se ideja e Kosovës Republikë u bart brez pas brezi.
“Ideja e Kosovës Republikë u bart brez pas brezi, nga viti ‘68 në ‘81 e ‘97, me daljen publike të UÇK-së përgjatë rezistencës së prirë nga Presidenti historik, Ibrahim Rugova e ndërtimit të aleancave nga ana e tij përgjatë luftës së UÇK-së gjatë viteve të ‘90-ta në krye me komandantin Adem Jashari e përfundimisht mori vulën në vitin 2008 me shpalljen e Kosovës”, tha ajo në përurimin e pllakës së Familjes Dumoshi.
Sipas saj, Kosova sot më në fund është Republikë, është vend i lirë, ndërsa kujtimi për patriotët e lëvizjes kombëtare do të jetë i përhershëm.
Përurimi i pllakës përkujtimore për Sadije, Xhemajl, Osman dhe Ismail Dumoshit u bë në shtëpinë e tyre, e cila ishte qendër e aktivitetit kombëtar.
Osmani tha se kontributi i familjes Dumoshi është frymëzim dhe motiv për të mbrojtur gjuhën, kombin dhe atdheun.
Gjithashtu u theksua roli i familjes Dumoshi në demonstratat e vitit 1968 si dhe përpjekjet për lirinë dhe pavarësinë e Kosovës.
Presidentja ka shtuar se kujtesa për familjen Dumoshi dhe heronjtë kombëtarë janë pjesë e pandashme e historisë dhe identitetit të Kosovës.
