Kryeministri i vendit, Albin Kurti e ka vizituar komunën e Dragashit dhe fshatin Kuk, pas vërshimeve të djeshme.
Kurti tha se vërshime e djeshme nga reshjet e mëdha të shiut kanë shkaktuar dëme të konsiderueshme edhe të infrastrukturës publike, për çka tha se nevojitet ndërhyrje urgjente.
“Megjithëkëtë, fatmirësisht nuk ka as të lënduar e as viktima. Me Komisionin vlerësues i cili po inspekton e analizon masën e dëmeve, po shohim se çfarë mund të riparojmë e rindërtojmë dhe të kontribuojmë nga niveli qendror”.
“Falënderoj institucionet e shtetit për angazhimin e deritanishëm dhe Kryetarin e Komunës së Dragashit, Bexhet Xheladinin për mikpritjen e tij sot dhe bashkëpunimin me ministrin Elbert Krasniqi”, shkroi Kurti.
Më tej, ai tha se qeveria është pranë komunës dhe qytetarëve për ta kaluar bashkë, sa më shpejt e sa më lehtë këtë situatë.
