Një sherr i madh ka ndodhur së fundmi në Sicili, Itali mes një familje shqiptare dhe një marokeni. Mësohet se shkak për përplasjen e dhunshme ku janë përfshirë 10 persona, është bërë lidhja që 18-vjeçarja shqiptare kishte me një 21-vjeçar maroken. Por prej disa muajsh kjo lidhje kundërshtohej hapur nga familja e të afërmit e vajzës që nuk donin një djalë me origjinë marokene.
Një natë, rreth orës 21.30, teksa dy të rinjtë po dilnin për darkë me motrën e vajzës, duke kaluar nëpër Piazza Roma, ata hasën në disa të afërm të 18-vjeçares, xhaxhait të largët 47-vjeçar dhe bashkëshortes së tij si dhe një çift miqsh të tyre. Sapo u takuan në rrugë, të afërmit e shqiptares nisën t’i ofendonin dhe në atë moment vajza, në përpjekje për të qetësuar gjakrat, iu kërkoi familjarëve të ndalonin, por ata e rrahën, e qëlluan me shpulla duke e kapur për flokësh.
Edhe i riu maroken u dhunua nga xhaxhai i shqiptares. Por 21-vjeçari në përpjekje për t’u mbrojtur mori një shkop në dorë. Gjatë përleshjes u shfaqën papritur anëtarët e tjerë të familjes, daja dhe gruaja e tij, përfshirë një 32-vjeçar me një thikë xhepi dhe një 37-vjeçar me shishe birre në dorë. Dhe përforcimet nuk kanë të ndalur: në vendngjarje kanë shkuar të afërm të tjerë shqiptarë, një 67-vjeçar, një 43-vjeçare dhe djali i tyre 23-vjeçar, të cilët dyshohet se janë përfshirë në sherr me grushta e shkelma.
Por shqiptarja dhe marokeni ia arritën të shpëtonin nga dhuna në rrugë, motrat u strehuan në shtëpinë e tyre dhe i dashuri humbi gjurmët për pak kohë. Disa sulmues (32-vjeçari, 37-vjeçari dhe 23-vjeçari), duke u munduar të gjenin të riun maroken shkuan në apartamentin e vajzave në via Vittorio Emanuele, duke thyer shtëpinë. Tre sulmuesit kur e panë që marokeni s’ishte aty u larguan. Në banesën e shqiptarëve mbërritën më pas daja me gruan e tij, të cilët sulmuan me shqelma, grushta dhe shuplaka jo vetëm të renë shqiptare, por edhe nënën e saj.
Karabinierët që ndërhynë i dhanë fund përleshjeve mes kërcënimeve dhe ofendimeve të dajave në shqip. Disa prej të lënduarve nga sherri masiv përfunduan në spital dhe disa prej tyre duhet të qëndrojnë të shtruar për shkak të dëmtimeve që kanë marrë.
