Të gjithë ata që kanë blerë bileta për ndeshjen Kosovë – Izrael do të rimbursohen brenda shtatë ditësh, ka njoftuar Federata e Futbollit e Kosovës.
Për shkak të zhvillimeve në Lindjen e Mesme ndeshja mes Kosovës dhe Izraelit, e vlefshme për kualifikimet e “Euro 2024”, e cila ishte e paraparë që të zhvillohej të dielën, në stadiumin “Fadil Vokrri”, është shtyrë.
“Pas njoftimit të UEFA-s për shtyrjen për kohë të pacaktuar të ndeshjes ndërmjet Kosovës dhe Izraelit, në kuadër të Grupit I për kualifikimet Euro 2024, e planifikuar të zhvillohej më 15 tetor në stadiumin “Fadil Vokrri” për shkak të situatës së krijuar së fundmi në Izrael, ku është shpallur gjendje lufte, FFK informon të gjithë personat të cilët kanë blerë biletat për këtë ndeshje, se mjetet do t’u rimbursohen automatikisht në periudhën kohore brenda 7 ditësh, në llogaritë bankare përmes së cilave i kanë blerë biletat”, ka njoftuar FFK. “Në rast se pas 7 ditësh ju nuk i keni pranuar mjetet në llogari, ju lutem kontaktoni në email: bileta@t-ticket.al ose tickets@ffk-kosova.com”.
