Kumbarët dhe biznesmenët kontrovers Milan Radoiçiq dhe Zvonko Veselinoviç ishin sërish në qendër të vëmendjes së publikut. Së pari për shkak të përfshirjes në konfliktin e armatosur në veri të Kosovës, së dyti për shkak të kërcënimit të pretenduar për sigurinë e inspektorëve Slobodan Milenkoviq dhe Dushan Mitiq që zbuluan rastin “Jovanjica”.
Opinioni në Serbi për dy kumbarët dëgjoi histori të cilat depërtojnë thellë në krimin e organizuar, por presidenti i Serbisë mundi të lavdërojë Milan Radoiçiqin, duke e quajtur atë gardian të Serbisë në Kosovë dhe luftëtar kundër mizorisë së kryeministrit të Kosovës Albin Kurti.
Siç shkruan “Nova”, Vuçiq i qëndroi asaj narrative edhe kur foli për 24 shtatorin – ditën kur Milan Radoiçiq, nënkryetari i Listës Serbe, organizoi dhe mbështeti më aspektin logjistik aksionin që u shndërrua në një konflikt të armatosur në Banjskë me katër të vrarë, përfshirë një polic të Kosovës dhe tre serbë nga veriu i Kosovës, transmeton Telegrafi.
“Sundimtarët e Kosovës”, poligraf idhe BMW
Zvonko Veselinoviq është marrë në pyetje sepse dyshohet se ka urdhëruar dhe paguar për likuidimin e inspektorëve Slobodan Milenkoviq dhe Dushan Mitiq.
Zyrtarët policorë të Drejtorisë Policore për qytetin e Beogradit kanë intervistuar Zvonko Veselinoviqin në lidhje me pretendimin e Slobodan Milenkoviqit se Veselinoviqi ka urdhëruar dhe paguar për organizimin e vrasjes së tij, si dhe vrasjen e Dushan Mitiqit, ka njoftuar Ministria e Punëve të Brendshme e Serbisë.
Ndërsa priste dërgesën e vaksinave në aeroport, presidenti serb Aleksandar Vuçiq tha atëherë se Radoiçiq kaloi një poligraf kur është fjala për përfshirjen e tij në vrasjen e Oliver Ivanoviqit, por kjo nuk është rasti për disa “tema të tjera” – pa specifikuar cilat.
Ajo që binte në sy ishte se “sundimtarët” jo formalë të Kosovës kryenin “detyrat e tyre qytetare” në xhipat BMW, transmeton Telegrafi.
Radoiçiq përfundoi në liri, ndërsa më parë ishte ndaluar dhe marrë në pyetje për rastin e Banjskës.
Me një veturë jo më pak të shtrenjtë ka mbërritur edhe Veselinoviqi para Stacionit Policor, natyrisht në cilësinë e qytetarit.
Nga Lista Srpska në listën e zezë
Zvonko Veselinoviq dhe Milan Radoiçiq ishin të lidhur me vepra të ndryshme kriminale – nga trafiku i drogës, përmes përfshirjes në vrasjen e Oliver Ivanoviqit, deri te nxjerrja e paligjshme e zhavorrit dhe nuk dihet nëse ata janë dënuar ndonjëherë.
Siç thuhet në aktakuzën e Prokurorisë Speciale në Prishtinë, ata akuzohen si drejtues të grupit kriminal përgjegjës për vrasjen e Ivanoviqit.
Në nëntor 2018, Radoiçiq arriti t’i ikte policisë së Kosovës dhe të strehohej në Serbi, pas kësaj ndaj tij u lëshua një fletarrest vendor dhe ndërkombëtar.
Si nënkryetar i Listës Serbe, Radoiçiq ishte drejtpërdrejt i përfshirë në politikë, ndërsa Veselinoviq u përfol se financoi fushatën e SNS-së [partisë së Vuçiqit]. Aleksandar Vuçiq ka mohuar vazhdimisht se ka lidhje me të, duke thënë se ata nuk janë dëgjuar kurrë me njëri-tjetrin dhe se janë parë dy herë në Kosovë.
Veslinoviq dhe Radoiçiq nuk ishin të njohur për opinionin e gjerë, derisa u bë e ditur se ata ishin në listën e të dyshuarve për përfshirje në vrasjen e Oliver Ivanoviqit. Në fund të vitit të kaluar, SHBA vendosi sanksione ndaj tyre, duke deklaruar se i përkasin rrjeteve korruptive të lidhura me krimin e organizuar ndërkombëtar.
