Dogana e Kosovës ka njoftuar për dy raste të ndryshme në pikën kufitare në Bërnjak, ku janë evidentuar dy raste të mjeteve monetare të padeklaruara.
Pas kontrollimit, dy personave i janë gjetur shuma mbi 10 mijë euro, përcjell Arbresh.info.
“Rreth orës 14:20, në hyrje të PKK Bërnjak, ka arritur një automjet në të cilin gjendeshin dy persona: vozitësi dhe një pasagjer. Gjatë një kontrolli rutinor, për shkak të dyshimeve, automjeti u selektua për kontroll në vijën e dytë. Zyrtarët doganorë pyetën palët nëse kishin diçka për të deklaruar, ndonjë mall për doganë apo mjete monetare. Pasagjerët u deklaruan se nuk kishin asgjë për të deklaruar. Gjatë kontrollit të automjetit dhe pasagjerëve nga zyrtarët e doganës dhe policisë, u zbuluan dy raste me mjete monetare në shumën mbi 10,000.00 €”, thotë dogana në njoftim.
Te personi i parë, dogana bënë të ditur se u gjetën 10,220 €, derisa tek personi i dyte gjetën 10,100 €.
“Pas zbulimit të rasteve, u njoftuan zyrtarët e hetuesisë, të cilët erdhën në vendin e ngjarjes dhe intervistuan palët. Për rastet në fjalë u njoftua prokurori i shtetit. Bazuar në Ligjin Nr. 05/L-096, palëve u konfiskua 25% e mjeteve monetare, ndërsa 75% e mjeteve monetare u ndaluan përkohësisht me urdhër të prokurorit”.
