Në një intervistë për revistën “FourFourTwo”, ish-futbollisti portugez, Deco, aktualisht pjesë e stafit drejtues të Barcelonës, u vu në pozitë të vështirë pasi iu kërkua të zgjidhte mes Cristiano Ronaldos dhe Messit, dy nga lojtarët më të mirë në botë dhe dy ish-kolegët e ish-mesfushorit të Portos e Barcelonës.
“Shikoni, janë dy lojtarë të ndryshëm”, filloi duke thënë Deco, i cili më pas shpjegoi: “Cristiano Ronaldo ishte një anësor i pastër në fazat e hershme, ai kishte topin dhe mendonte vetëm për të dribluar kundërshtarët e tij. Ai është rritur shumë si lojtar, është bërë “bisha” konkurruese që e kemi parë prej kaq kohësh. E kishte gjithmonë synim të zhvillonte veten në çdo mënyrë të mundshme”.
Lidhur me Messin, krah të cilit Deco luajti te Barcelona, portugezi shprehet: “Messi ka qenë gjithmonë një talent natyral. Ai e përshtati lojën e tij me kalimin e kohës, por mënyra e lëvizjes ka qenë gjithmonë e njëjtë, ndaj është e vështirë të zgjedhësh mes njërit dhe tjetrit”.
Duke thënë këtë, Deco përfundoi: “Bota ideale do të ishte t’i kisha të dy në ekipin tim. Me ta, gjithçka që duhet të bësh ishte të pasosh topin dhe pjesa tjetër ishte e kryer!”
