Deputetja nga radhët e Lidhjes Demokratike të Kosovës, Hykmete Bajrami ka kritikuar Qeverinë për hapjen e Urës së Ibrit.
Ajo në emisionin Frontal tha se partia në pushtet nuk ka një projekt pë zgjidhjen e qytetarëve.
“Në mungesë totale të një projekti të vetëm të zgjidhjes së problemit për qytetarët e Kosovës, në vazhdimësi ka krijuar kriza dhe kauza për veriun duke i mbajtur të gjithë qytetarët aty. Nuk ka asnjë shqiptarë që do të ishte kundër hapjes së Urës së Ibrit, por megjithatë KFOR është garantuesi i sigurisë në veri. Përderisa kemi një situatë të tillë në veri ne konsiderojmë që çdo gjë duhet të jetë në koordinim me ta.”
Më tutje ajo ka komentuar edhe reagimin e ndërkombëtarëve lidhur me këtë çështje.
“Është dëmtimi i imazhit në Kosovë, ne e kemi pa që Kryeministri i Kosovës gjatë këtyre tre viteve e gjysmë, ka qenë totalisht i izoluar, nuk kemi avancuar absolutisht asgjë në agjendën ndërkombëtare, dështuam në Këshillin e Evropës. Përpos që jemi në sanksione, është Bashkësia Evropiane, që kanë kërcënuar këto ditë që nëse ka aksione të njëanshme ka mundësi që masat të shtohen ose të zgjaten.”
