Këngëtari i njohur Labinot Tahiri ka treguar se ka mbledhur shumën rekord prej 200 mijë euro për bamirësi brenda 24 orëve me ndihmën e diasporës dhe të gjithë atyre që kontribuuan, shkruan Neutral Bizz.
Gjatë një interviste ekskluzive në podcastin e ri të producentit të njohur Bini Diez, i titulluar “Dheze Mikrofonin”, ai ndau detaje për këtë arritje të jashtëzakonshme.
Si mysafiri i parë në këtë podcast, Labinoti ka folur për përkushtimin e tij ndaj bamirësisë dhe rolin e tij si humanist.
Podcasti “Dheze Mikrofonin” synon të sjellë histori inspiruese dhe biseda me figura të njohura nga estrada shqiptare dhe fillimi me një personazh si Labinot Tahiri tregon për ambiciet e larta të Bini Diez për këtë projekt të ri. Episodi i parë ka marrë një vëmendje të madhe dhe është pritur ngrohtë nga publiku, duke premtuar një seri bisedash të thella dhe interesante në të ardhmen.
Labinot Tahiri, i njohur jo vetëm për karrierën e tij muzikore por edhe për angazhimin e tij të madh në komunitet, ka treguar edhe një herë se zemra e tij rreh fort për të ndihmuar të tjerët. Ky rrëfim i tij në “Dheze Mikrofonin” shërben si një shembull frymëzues për të gjithë ata që dëshirojnë të bëjnë një ndryshim pozitiv në shoqëri./ Neutral Bizz.
