Këtë javë, Shqipëria do të ndikohet nga kushte të paqëndrueshme atmosferike si rezultat i tërheqjes graduale të qarkullimit anticiklonar afrikan me masa ajrore të ngrohta e të thata dhe depërtimit të masave ajrore të lagështa dhe të ftohta veriore.
Në pjesën më të madhe të ditëve, presioni do të jetë i ulët dhe luhatjet e temperaturave do të jenë të theksuara sidomos rëniet në vlerat maksimale.
Ditën e hënë moti do të jetë i kthjellët dhe vranësirat të larta e transparente kalimtare.
Ditën e martë moti fillimisht do të jetë i kthjellët, ndërsa pas orëve të mesditës ka ndryshim total të situatës meteorologjike, ku ka zhvillim gradual të vranësirave.
Vranësirat do të jenë mesatare deri të dendura shoqëruar me reshje shiu me intensitet të ulët deri mesatar në formë shtrëngatash.
Reshjet e shiut do të jenë prezente edhe gjatë ditës së mërkurë. Të enjten dhe të premten në formën e rrebesheve të shpejta e stuhive me shkarkesa elektrike dhe breshër, të cilat në intervale të shkurtra kohore në veriperëndim të vendit dhe në zonat urbane kryesisht gjatë ditës së mërkurë shfaqen problematike.
Reshjet e dëborës do të rikthehen në Alpe dhe në relievet malore në veri-verilindje-juglindje të vendit me intensitet të ulët e lokalisht mesatar në lartësitë mbi 700m, raporton TCH.
