Një operacion policor është zhvilluar sot në një zyre që është ngjitur me hyrjen e stacionit policor “Qendra” në Prishtinë, ku fillimisht dyshohej se janë duke u ofruar shërbime të kundërligjshme mjekësore, raporton Gazeta Neutral.
Burimet e Gazetës Neutral bëjnë të ditur se në objektin që gjendet në qendër të Prishtinës te 92-shi, gjendej një zyrë e cila dyshohet se shërbente si zyrë ndërlidhëse me Serbinë që nga koha e UNMIK-ut.
Sipas ministrit të MPB-së, Xhelal Svecla, organizata joqeveritare “Centar za Mir i Toleranciju Pristina” nuk është shfrytëzuar fare për natyrën e kësaj OJQ-je, por janë kryer veprimtari ilegale.
Krejt kjo ka ndodhur para syve të Policisë e institucioneve tjera përreth, gjë të cilën ai e quajti si rrezik për sigurinë e vendit.
“Në mëngjesin e sotëm kemi pranuar informatën mbi aktivitetin e dyshimtë të një Organizate Joqeveritare, e vendosur në një aneks të Stacionit Policor Qendra në Prishtinë.
Departamenti i Organizatave Joqeveritare në kuadër të MPB-së ka konfirmuar se organizata në fjalë “Centar za Mir i Toleranciju Pristina” nuk ka respektuar legjislacionin në fuqi mbi funksionimin e OJQ-ve.
Pas bastisjeve është kuptuar që ajo hapësirë nuk është shfrytëzuar fare për natyrën e kësaj OJQ-je.
Kësisoj, kemi njoftuar institucionet përkatëse të sigurisë dhe është konfirmuar se e njëjta ka veprimtari ilegale gjë e cila është vërtetuar pas hyrjes së Policisë dhe Prokurorisë brenda objektit. Një veprimtari e tillë në mes të tre institucioneve më të larta të sigurisë së Kosovës, Ministrisë së Punëve të Brendshme, Kryeprokurorisë dhe Policisë së Kosovës është tejet e dyshimtë dhe paraqet rrezik për sigurinë e vendit.”
/GazetaNeutral/
