Menaxhmenti i Trepçës ka marrë vendim që ta suspendojë nga puna kryetarin e sindikatës, Ibrahim Jonuzin. E Jonuzi për “Indeksonline” ka deklaruar se veprimet e tilla, nuk i shërbejnë demokracisë dhe kanë për qëllim ta shuajnë zërin e punëtorëve, për t’i kërkuar të drejtat e tyre.
“Vendimin nuk e kam marrë zyrtarisht. Pas tre dite që kanë marrë vendimin, ne e kemi marrë vesh sot se jemi suspenduar nga marrëdhënia e punës. Mirëpo mendojmë që kjo nuk i shërben demokracisë dhe kauzës për t’i nxjerr minatorët nga greva. Veprimet e tilla nuk i ndihmojnë demokracisë dhe e shuajnë zërin e të drejtave të punëtorëve. Iu bëjë thirrje të gjitha organizatave qeveritare dhe jo qeveritare, jo për emrin tim personal, por për zërin e sindikatave e të drejtave të punëtorëve do të reagojmë, do të luftojmë. S’po kërkojë që të më mbrojnë mua personalisht, por të drejtat e punëtorëve në gjithë territorin e Kosovës”, tha ai.
Ndërsa këtë veprim të menaxhmentit e quan tinëzar.
“Është vendim tinëzar dhe i msheft dhe si i tillë duhet mos ta pranojmë dhe të luftojmë. Përmes disa kolegëve të punës e kuptuam lajmin për suspendimin pas tri ditësh. Mirëpo për neve nuk është valid sepse zyrtarisht nuk e kemi pranuar. Për neve me rëndësi mbetet nxjerrja e minatorëve. Po e shihni me çfarë menaxhmenti kemi punë. Tash e shtatë ditë i keni minatorët të mbyllur, për vendime të fshehta të njëanshme dhe tinëzare”, tha ai.
Ndryshe, minatorët e Trepçës kanë hyrë në ditën e shtatë të grevës, me kërkesat për pagë e kushte më të mira të punës.
